西甲:畢爾包佔地利明恰切爾達

畢爾包佔地利明恰切爾達今晚西甲獨腳戲，畢爾包主場迎戰切爾達。「巴斯克雄獅」一向靠主場搵食，每當喺自己地頭出擊例踢高一皮波，切爾達太過倚賴伊亞高艾斯巴斯數胡，一旦被箝制立即死晒火，主勝有買趁早。（Now632周六凌晨4時直播）畢爾包向來都係主強客弱，雖然依家冇球迷入場打氣，但呢種格局仍然未變，佢哋今季所取得嘅13分，有9分係來自主場，除咗次輪主場爆冷輸畀卡迪斯外，近3場喺自己地頭出擊全部贏晒，包括勇挫塞維利亞雙雄西維爾同貝迪斯，蒙尼恩連續2仗主場都有進帳，呢種主場例踢高一皮波嘅信心，亦正如佢哋作客特差一樣，好難解釋。切爾達前線靠老將孭飛另一邊廂，位處下游嘅切爾達，今季仍要為護級而戰，主帥奧斯卡加西亞喺11月頭被炒，搵嚟球隊名宿伊度亞度高特接手，近2仗取得1勝1負，只係略有起色。切爾達最大問題，係冇人能分擔伊亞高艾斯巴斯嘅入球重擔，只要呢位老將被嘜死，進攻即刻陷於癱瘓，單計聯賽11個入波中，伊亞高艾斯巴斯就佔咗5個，可見一斑，加上中場奧基約高斯魯今仗坐波監，造訪主場兇狠嘅「巴斯克雄獅」，凶多吉少，主勝值得捧場。