意超盃:拿玻里祖記半和好路 1場決勝踢得更謹慎

拿玻里祖記半和好路1場決勝踢得更謹慎一年一度嘅意大利超級盃，今晚於中立場舉行，由上季意甲盟主祖雲達斯硬撼意大利盃冠軍拿玻里，亦係兩大主帥、前AC米蘭中場拍檔派路同加度素首次於執教生涯交鋒。祖記日前於國家打吡完敗，主帥派路備受批評，何況拿玻里近況弗爆，為爭盃一定睇準先至出擊，加上近屆意超盃旺開半場和，今場不妨再追。（周四凌晨4時開賽）其實祖記今季人腳冇乜大變，上季兩循環鬥國際米蘭都贏得好輕鬆，但日前聯賽再對死對頭意外淨吞兩蛋，整場比賽完全處於下風。要知道國米實力雖強，但之前6仗都有失波明顯防守麻麻，不過「斑馬兵團」畀國米逼到方寸大亂，最終以0比2落敗已經算輸得少，連向來要面嘅C朗都踢到頭耷耷，主帥派路面對劣勢下冇作出應對之策，責無旁貸被圍插。事實上呢位新丁教頭接手之後，祖雲達斯今季表現時好時壞，大軍仲有保羅戴巴拿、古達度等因傷缺陣，今仗一場過定生死，相信會踢得更加小心謹慎。減少控球專心反擊更不利祖記嘅理由，係對手拿玻里狀態大勇，各項賽事近5仗取得4勝1負，尤其係上仗對住費倫天拿，拿玻里刻意減少控球，專心打突擊幾乎針針見血，最終大炒6比0足見效率奇高，主帥加度素球員時代以爛打硬淨見稱，令隊友派路踢得好舒服，一定諗到計仔對付呢位昔日拍檔。翻查紀錄，近5屆意超盃祖記都有參賽，只有兩次法定時間贏波順利捧盃，而且其中4仗開半場和，可見決賽場合，大家都穩打穩紮，半場和不妨追多鋪。