韋斯咸勒住踢做細界|東方日報

周六凌晨英超賽事，韋斯咸主場迎戰賓福特，兩隊喺聯賽重開第一仗都喺領先下失分，球員體能狀態明顯未到預期水平，快車期唔可能場場搏到盡，預料今仗會踢得保守，務求先穩住防線。主隊韋斯咸火力不足，今場開2.5球嘅入球細機會極高。

（Now 622周六凌晨3時45分直播）

韋斯咸上場作客阿仙奴，半場領先下輸1比3，「錘仔幫」有前鋒施卡馬卡同翼鋒哥尼特繼續缺陣，令本來已經唔多銳利嘅鋒線再受削弱。韋斯咸今季16場聯賽只入13球，只係靠迪格蘭賴斯等防守球員撐住，近8場聯賽主場有6仗總開入球2球或以下，以守代攻係佢哋唯一法寶。

賓福特靠晒艾雲東尼

作客嘅賓福特雖然已連續4場聯賽不敗，但上仗領先熱刺2球下被逼和2比2，防線出現唔少漏洞，今場會以更穩陣踢法迎敵。賓福特前線靠艾雲東尼單天保至尊，韋斯咸後防勢必盯死呢位心腹大患，考慮到兩隊體能出現問題，今場未必會出現太多入球。