U23亞洲盃：烏茲別克爭冠有本錢_東方日報

今晚U23亞洲盃日本U23同烏茲別克U23合演冠軍戰，烏茲別克今屆5場贏晒兼保持不失，攻守兼備，面對整體表現一般嘅「小藍武士」，烏軍平手盤坐和望贏格。
（HOY TV 76台周五晚11時30分直播）

攻守兼備今屆未失過波
雖然日本質素唔使懷疑，前鋒細谷真大亦漸入佳境，但今屆予人太過老定之感，5戰法定時間只得3勝1和1負，而且埋門一般，8強對住東道主卡塔爾，日本大部分時間踢多一人下，竟一度落後1比2，幾經辛苦逼和，加時再贏4比2過關，去到4強對伊拉克早早領先兩粒，易邊後大量錯失機會，表現唔算突出。

相比之下，烏茲別克今屆5戰全勝之餘，狂轟14球及未失過波，前鋒洛查耶夫已有3球進帳。烏軍喺4強面對奇兵印尼，一度先失守，好彩VAR指印尼越位在先入球無效，轉頭洛查耶夫就打破僵局，之後對手更有球員被逐及擺烏龍，擺明有運行，而且佢哋首獲奧運入場券士氣大振，加上近4屆3度入決賽，似乎比「小藍武士」更重視呢項賽事，有力繼2018年後再度封王，平手盤必捧。