德國盃:萊比錫做拜仁細界

萊比錫做拜仁細界創會10年蓄銳衝首冠第76屆德國盃今晚柏林奧運球場（中立場）上演王者戰，RB萊比錫挑戰班霸拜仁慕尼黑，萊比錫喺德甲煞科戰收起全部主力，蓄銳今仗衝擊球會史上首個重要冠軍，有力製造麻煩畀拜仁，兩軍歷來交手入球都唔多，讓球盤拜仁讓一球，建議雙選下盤同中位數2.5/3球細盤。（周日凌晨2時開賽，馬會網上文字宜播）今次係拜仁歷來第23次殺入德國盃決賽，佢哋已經贏過18次冠軍，係總成績排第2雲達不來梅（6次）嘅3倍，至於萊比錫創會僅10年，最叻只贏過第4級別聯賽冠軍，德國盃之前連8強都未入過，講經驗簡直冇得比，不過萊比錫近年冒起甚速，上屆德國盃第2圈面對拜仁，當時法定時間踢成1比1，最終鬥到加時兼互射12碼，拜仁至險勝，睇番兩軍歷來7次碰頭多數少交收，共有5次總入球喺兩球或以下，包括今季聯賽兩循環，萊比錫作客輸0比1，跟住主場和0比0，可見佢哋打拜仁會以穩為先，況且，拜仁喺對賽法定時間成績係4勝2和1負，但近3次交手只係勝和負各1，證明雙方實力已經愈嚟愈接近。尼高高華領軍守優於攻萊比錫喺德甲煞科戰收起晒主力，擺明蓄銳今晚爭盃，至於拜仁就有中場哥列斯卡因傷缺陣，雖然今仗對教練尼高高華嚟講係生死戰，若然捧唔到盃下季都好難有機會留低，但佢教波始終係防守起家，進攻瓣數不足組織亦唔夠流暢，德甲最後兩場作客賽事都只能和波收場，加埋只入得1粒，證明作客火力冇保證，好在今仗有門神紐亞傷愈復出把關，又起用防守力最強嘅查維馬天尼斯取代哥列斯卡踢防中，令成隊波更守優於攻，遇上處心積慮主守嘅萊比錫，恐怕唔係咁易咬得入