曼聯客客形勢明朗

曼聯客客形勢明朗
 
可能因為唔使打歐聯關係，英超賽會竟安排「紅魔鬼」曼聯喺星期一晚登場，一眾魔迷要睇波又要捱夜嘞。講番場波，曼聯級數肯定喺西布朗之上，只係佢哋近戰顯示好鍾意喺上半場狂攻對手，到下半場就放慢腳步，投注上捧「客客」或比「讓客」穩陣。（周一11，now621台周二3:00am直播）

曼聯今季改由雲高爾執教，佢更喺季初轉會窗作出大換血，一時間由以往費格遜年代限米煮限飯，到依家變成英超「銀河艦隊」，事實紅魔有齊迪馬利亞、法卡奧、尹佩斯、桑馬達以及今晚繼續坐波監嘅朗尼之後，攻擊線陣容確係星光熠熠。

鍾斯復出防守力大增

前線咁勁，但曼聯後防由於受傷兵潮困擾，3名正選中堅菲爾鍾斯、莊尼伊雲斯以及基斯史摩寧試過同一時間受傷，搞到全無經驗嘅小將泰萊布力基同受緊傷今晚又唔出得嘅麥尼亞，都要輪流擔大旗同新兵馬高斯盧祖鎮守中路，冇經驗冇默契下試問又點可能穩陣？可能正因為咁，曼聯近排踢法有啲有前冇後感覺，更鍾意一開波就狂攻，近戰對李斯特城、韋斯咸以及愛華頓，都係半場輕鬆領先，到換邊後希望守到尾完場，而當中亦只得對李斯特城嗰場波守唔住，再配合菲爾鍾斯可以復出，防守會變得更穩陣，投注上捧「客客」確係比「讓客」穩陣。

西布朗主場鬥魔冇優勢

主隊西布朗今季聯賽贏過兩場，都係9月尾比賽而手下敗將係熱刺同埋般尼，再睇佢哋上輪作客利物浦僅僅輸1:2，毫無疑問演出已漸見進步；問題係，西布朗喺比賽中顯示鋒力唔太足夠，至今僅入8球僅比後面般尼同昆士柏流浪好啲啲，事實佢哋唯一可信球員係得英格蘭U21成員比拉希奴，但呢位新星近日又傳出受熱刺青睞，雖然西布朗方面已講明唔賣，但對比拉希奴而言，心態上或多或少會受到影響，如果連佢都失準，近7季第6度主場輸俾對手機會好大。