九叔 ：南球盃爭霸 河床有育食

南球盃決戰次回合聽朝爆發，坐鎮主場嘅阿甲「二哥」河床，今季銳意爭取雙冠，對住哥倫比亞超聯「三哥」國民體育會，小勝捧盃一啲都唔難，一於博1.6倍主W。

（開賽時間：周四早上8:15）

河床今年表現唔錯，响阿甲暫時排第2，只係落後競賽會2分，南球盃更加入埋決賽，首回合作客1:1和咗國民體育會，只要今日喺次回合主場贏波，第一個冠軍就會落袋，到時再谷埋最後一啖氣衝阿甲，就有機會做雙冠王嘞。

河床主力叫球迷咪掟煙花
由於南球盃冇採用作客入球優惠，河床想捧盃就一定要贏。其實佢哋又有條件砌低國民體育會嘅，好似首回合咁，上半場踢到劈嘢咁，幾乎畀國民嗰邊插兩、三球，好彩下半場瞓醒，即刻判若兩隊追番和，就足以反映佢哋起碼高半班波。

何況河床今日個陣容仲齊整過首回合，上場坐波監嘅中堅加比馬卡度出得番，教頭加拿度只係度緊用馬丹拿定係謝文薛比拿，同佢合作扼守中路啫，大把兵任佢揀。而且河床個體育總監法蘭斯哥利仲出嚟派定心丸，話無論南球盃、阿甲攞唔攞到冠軍，會方都唔會郁加拿度，事關佢今季帶隊响國家打吡贏過死敵小保加，功勞好大喎，令到成隊波冇晒壓力。

相反國民體育會壓力就大喇，河床個主場可以坐成7萬人，班球迷又以癲喪出名，賽前幾位河床大佬艾利爾洛查士、拉美路富尼斯摩利親自拍咗段片，呼籲班擁躉齋打氣唔好掟煙花，以免球會受罰破財，就知到時場面可能超恐怖。國民體育會都知道難捱，所以擬定咗套死守策略，仲要針對性凍結河床中場主力邦斯奧、卡路士辛捷士幾個，希望頂得幾耐得幾耐。呢場咁嘅攻防戰，冇理由唔捧河床啫。