波爾多平盤明益「里」

波爾多平盤明益「里」
 
法甲今晚上演前列戰由波爾多對里昂。計級數里昂好似高啲，但波爾多主場威力唔講得笑，初盤讓球開平手盤，1.8倍平盤主勝博得過。（周日34，無綫網絡電視302頻道周一4:00am直播）
表面上波爾多近兩周贏唔到，但其實全部係作客，過去周中更喺法聯盃作客迫和里爾，就算最後射輸12碼出局一樣係好賽績；此外波爾多一向主場特佳，近10戰7勝3和入22球，連摩納哥等造訪都俾人大炒，陣容上又僅得安祖樸高同比利拿特等長期傷將缺陣，捧平手盤坐走望贏格局。
里昂係除巴黎外，今季法甲第二線勢力，球隊聯賽3連勝連贏蘭斯、伊維恩同卡昂；但里昂亦有年輕球隊通病，就係客場遇強隊腳軟，早前對聖伊天就輸到0:3完場，再加上中核靈魂哥古夫有傷肯定缺陣，全失3分機會頗高。