華倫作客「畢」留情

華倫作客「畢」留情

西甲今晚有場前列大戰由畢爾包喺主場迎戰華倫西亞。華倫仍要力保前四以爭取來季歐聯參賽資格，撞正主隊畢爾包啱啱輸俾西維爾而今季主場勝出率唔高，作客依然捧得過。（周四7，now632及無綫網絡電視13頻道周五2:00am直播）

華倫西亞過去周末主場悶和維拉利爾後，依家僅領先西維爾3分，被馬體會攞番個三哥位之餘，仲要擔心被西維爾搶埋個來季歐聯參賽席位，咁嘅情況下球隊今晚冇可能唔去盡，戰意方面先唔使擔心。
此外，華倫西亞唔經唔覺已累積8場不敗，當中攞到6勝2和，僅喺馬體會同維拉利爾身上失分；事實華倫近排表現咁好，幾名主力好似皮亞堤、柏利祖、柏高艾卡沙以及安祖高美斯絕對大有功勞，呢班年輕當打球員去到季尾體力預期亦唔會點回落，突然失準機會唔大。

畢爾包對賽往績差

主隊畢爾包今季整體表現一般，雖然歐霸輸俾拖連奴出局後，一度造出5連勝佳績，但上輪作客0:2輸俾西維爾，就完全顯露出球隊遇上強手就冇把握呢個問題；再講，畢爾包過往一向有極佳主場賽績，但呢支巴斯克球隊今季踢14場聯賽僅得6勝，勝出率連一半都冇；再翻查往績，畢爾包近六季主場對華倫竟然輸咗三次，如不分主客近六次對碰亦僅曾一勝，數據咁弱仲話要讓波，梗係撐華倫西亞啦。