法達斯維：過門都係客捧巴塞

冇伊巴冇雷斯 PSG殘陣勢危
今晚歐聯8強首回合爆發「兩巴」大戰，由巴黎聖日耳門(PSG)主場火併巴塞隆拿，「地上最強」因有右閘丹尼爾停賽，有傳會以攻代守變陣打343，主帥安歷基更大玩激將法，谷到「新比利」尼馬成肚火，勢必將滿腔怒火發洩喺傷停多多、疲於奔命嘅PSG身上，斯維相信巴塞作客花都一樣夠殺，呢場力撐客W。

（有線61、64、201及203台周四凌晨2時45分直播）

丹尼爾停賽 改踢343
巴塞只得丹尼爾服刑同長期傷兵華美倫缺陣，基本上夫添出擊，但冇咗出擊力強嘅右閘丹尼爾，後備嘅馬田蒙度亞同艾迪安奴都唔係嗰個級數，因此有傳主帥安歷基打算變陣出擊，由用慣嘅433改為343陣式，索性打少個後衞，加強中前場嘅控球能力同攻擊力。查實「兩巴」今屆於分組賽同組各勝一仗，其中巴塞贏嗰場就係變陣343，睇嚟有啲計喎，今仗實行照辦煮碗。

除此之外，安帥仲玩埋激將法，先喺前仗對艾美利亞特登收起尼馬，美其名係畀佢休息餓吓波，上仗作客西維爾，呢位巴西前鋒即刻生晒兼轟入一個靚絕罰球，比起浪費3次「餐士」嘅蘇亞雷斯更弗，勢估唔到下半場中段無喇喇被換出，搞到佢返到後備席嬲到掟晒鞋，「新比利」一向要面唔衰得，今仗必定搏甩髀帶領球隊贏波，證明安帥換走佢嘅決定係錯。

卡雲尼孭飛靠唔住
另一邊廂，法甲一哥PSG雖於歐聯持續進步，上圈次回合喺王牌伊巴謙莫域被逐嘅劣勢力戰淘汰車路士，不過踢波嘅嘢一場還一場，PSG今仗除咗伊巴坐波監外，後衞奧里亞同中場馬高華拉堤亦要停賽，仲有「爆炸頭」中堅大衞雷斯因傷倦勤，陣容咁甩皮甩骨，睇番PSG今季4線作戰，除咗日前大炒巴斯蒂亞捧走法聯盃外，法足盃亦殺入決賽，聯賽只領先里昂1分咁大把，未到終點都未知鹿死誰手，成班波谷到咁行唔攰就假，想做4冠王？隨時貪字得個貧呀。

此外，箭頭卡雲尼近年每逢大戰於伊巴缺陣下，總係唔夠料擔大旗，包括上屆8強次回合作客輸畀車仔一役，今仗撞正喺烏拉圭國家隊成日騎住佢嘅巴塞前鋒蘇亞雷斯，實冇運行喇。「地上最強」瓣瓣都贏少少，加加埋埋足夠佢哋喺首回合先拔頭籌，客W有1.63倍直情係抵買。