SAMVO肥叔 ：拉素正氣唔怕讓得辣

為彈甩死敵羅馬場場搏
成日都話意大利波蠱惑多，不過唔好一竹篙打一船人，好似「藍鷹」拉素經過早排聯賽八連勝後，一鼓作氣升上次席，正氣到暈，為免畀同市死敵羅馬爬頭，今晚聯賽作客阿特蘭大必定搏甩髀，讓到半一似係信心標誌，一於捧上盤。

（周日晚9時開賽）

意大利足球今非昔比，除咗06年「電話門事件」令個朵臭晒之外，近年意甲球隊於歐洲賽成績差強人意，水平被其他國家嘅球隊愈拉愈遠，昔日「迷你世盃」美譽俱往矣，況且最靠得住嘅祖雲達斯，贏波賠率相對乏味，米蘭雙雄又嚴重跌Watt，因此投注者對意甲都敬而遠之。不過，意甲兵今屆於歐洲賽全面復甦，祖記殺入歐聯4強，拿玻里同費倫天拿亦闖入歐霸準決賽，勁過大把水嘅英超多多聲喇。

阿特蘭大有權揀波踢
拿玻里同費倫天拿喺歐霸咁搏命，無非係睇中奪冠可取得來屆歐聯入場券，但點解唔力爭聯賽前三嘅歐聯資格呢？因為佢哋已經畀祖記同羅馬雙雄甩開成條街，其中羅馬雙雄之一、次席嘅拉素忽然回勇，早排聯賽八連勝令人喜出望外。雖然拉素人腳一般，但以蔗渣價錢踢出燒鵝味道，最重要係比起祖記等名牌球隊，「藍鷹」就算讓波都唔會讓得太離譜，不過今晚作客尾四嘅阿特蘭大要讓到半一，睇落有啲牙煙，但查實阿特蘭大已幾近上岸，隨時揀波踢，無謂同強隊硬碰硬喇。拉素近六仗作客贏咗五場，佢哋唔想畀同市死敵羅馬過頭必定搏盡，「藍鷹」勢頭咁強勁，肥叔認為以半個盤博贏晒成個盤都值得，不妨入少少拉素上盤。