巴塞隆拿光宗耀「祖」

巴塞隆拿光宗耀「祖」

萬眾期待，今個球季最重要一場大戰！歐聯決戰德國柏林；巴塞隆拿「MSN」組合已到無堅不摧地步，唔好話祖記防線，拉條2006年意大利國家隊防線都未必守得住，而且屋漏偏逢連夜雨，祖記後防大將基亞連尼已經肯定唔出得，祖記連可變之途都冇埋，睇嚟巴塞的確有能力90分鐘解決對手，為沙維送上臨別最後一份大禮。（周六1，有線61、64、201、203台周日2:45am直播）

祖雲達斯今季之所以有咁大進步，甚至有能力淘汰皇馬殺入歐聯決賽，兩個前現任主帥功勞絕大，上一手干地用3年時間建立一條極之穩固，而且更係意大利國家隊骨幹嘅防線，中場有定海神針派路，亦簽入年輕有活力嘅普巴，祖記的確喺中後場上保持極高穩定性。

祖記反擊成勝負關鍵

不過呢隊班馬兵團殺出歐洲兩季，喺進攻上似乎搵唔到破門方法，但到今季艾歷尼接手，防線穩健依舊，進攻上亦帶入多種新元素，例如一條凌形中場冇固定位置，前線亦由死板嘅單箭頭，換成泰維斯搭摩拉達全能型組合，喺反擊甚至死球戰術上攞到唔少甜頭，對於巴塞防線嚟講，最怕就係呢兩種前鋒，摩拉達喺入楔食身位上能力之高，已有前輩摩連迪斯級數，面對非中堅出身嘅馬斯查蘭奴會有優勢，而泰維斯如今場主攻右路，面對身形單簿嘅艾巴亦有搶甩打反擊機會，祖記能否把握巴塞後防小漏洞，肯定係今場勝負關鍵。

基亞連尼受傷影響大

不過對於巴塞嚟講，失波又有咩好驚先，佢哋條「MSN」鋒線，單季攻入120球，單一個美斯已有58入球27助攻，要守得住佢哋真係泊兩架大巴都未必夠，而有傳恩尼斯達有微傷在身，但以小白今季整體表現，可能放沙維落嚟威力更大，而且今場祖雲達斯有基亞連尼受傷，更加係祖記致命傷，且記得祖雲達斯4強兩回合打皇馬都係先用442，待形勢不佳轉回352再取得入球，呢場先發用442無可厚非，但如巴塞攻入第一球，祖記想變都冇人去變，今次呢個三冠王之爭，肯定巴塞秤先好多。