Mic少：祖記半場和快執

摩納哥落後唔敢急
歐聯8強次回合，摩納哥主場對祖雲達斯，雙方首回合拉成均勢，祖記能夠贏1比0，好大程度因為球證誤判十二碼，今仗去到法國，好難再獲球證眷顧。摩納哥礙於質素所限，想發圍並唔容易，而且只係落後一球，唔需要太冒進，否則壓得太前隨時畀祖記偷襲。Mic少預料上半場會處於拉鋸局面，換邊後先至真正埋牙，一於博1.92倍半場和。

（有線62及202台周四凌晨2時45分直播）

摩納哥首回合表現唔差，攻門次數甚至多過祖記，但把握力欠佳，皆因呢支法甲褪色豪門失去法卡奧及占士洛迪古斯之後，前線欠缺具級數射手。貝碧托夫已經三十四歲，難以長時間保持勇態，更何況佢一向並非多產前鋒，水準唔可靠。至於首席射手安東尼馬迪爾年僅十九歲，無論技術及經驗都比較幼嫩，去到歐聯比賽顯得未夠班，要攻破祖記門神保方十指關，實在困難重重。

此外，摩納哥首回合只係輸緊0比1，嚟到次回合只要入一球就可以扳平，根本唔需要太冒進，否則一旦被祖記一次突擊取得作客入波，形勢就會非常惡劣。事實上，摩納哥近四次主場出擊都未贏過，今仗未必可以佔到太大甜頭，相信只能慢慢等待機會。

斑馬兵團踢法留前鬥後
另一邊廂，意大利球隊一向作風穩健，「斑馬兵團」祖雲達斯有一球在手，肯定加強防守打突擊。祖記今屆歐聯四場作客，只有一場上半場入到波，踢法傾向留前鬥後。由於保羅普巴、馬田卡沙利斯、卡華禾艾沙姆仍然養傷，派路亦剛傷愈冇耐，祖雲達斯人腳唔算充裕，呢場波更加要慳住使，唔會同摩納哥硬碰，實行拉布到底，因此吼半場和最好不過。