撐威爾斯「時」來運到

撐威爾斯「時」來運到

一隊空有球員質素，但打唔出隊形嘅波，憑咩有世界排名第二呢？歐洲國家盃外圍賽B組榜首大戰，比利時坐擁黃金一代成員，可惜教練韋莫斯不外如是，戰術單適不在話下，上場友賽法國又有咩必要盡九牛二虎之力，搞到費蘭尼賽後受傷，威爾斯歐國外未輸過，首循環作客都迫和你比利時，而且今場一贏幾近鎖定下屆決賽周資格，呢場戰意搭夠可勝比利時。（周五9，有線64及203台周六2:45am直播）

比利時剩係數個陣出嚟都嚇親人，又夏薩特、又古爾圖斯又有迪布尼等，個個都歐洲超新星，不過再好材料都有人識煮至得架！世界盃時已經見到，韋莫斯帶呢班波熱情有餘能力有限，戰術變換、小組攻擊細膩度都只係二線水平，佢根本唔可以完全發揮比利時球員實力。
而更白痴嘅係，明知有場作客威爾斯大戰在後，對上一場友賽法國，又有咩必要博到咁盡？費蘭尼嗰場表現光芒四射，不過就係去得太盡傷埋，今場肯定唔出得，主場一役都只係踢成0:0，呢次作客可以惡得去邊？

比利時對賽往績麻麻

威爾斯因應有大熟嘅藍斯同加里夫巴利，都算係黃金時期，只要其綠葉配合到，就唔怕任何對手；事實上，佢哋喺外圍賽表現的確標青，5戰取11分未輸過，當中面對火力最強兩支球隊，包括比利時及波斯尼亞都冇失波，所以即使佢哋今場都未算「夫添」，賓戴維斯同占士哥連斯都唔出得，防守上有一定壓力，但韋莫斯斯都唔係一個大膽嘅教頭，作客亦唔會主攻，睇嚟威爾斯可以偷襲1球再死守完場。
事實翻查往績，可以留意到比利時用上黃金一代後，對威爾斯反而冇優勢，上循環悶和對手，2013年喺世界盃外圍賽其實亦只可以打和對手1:1，今晚仲要由主場變客場比賽，的確信唔過。